پاکستان اپنی خارجہ پالیسی اصولوں پر استوار رکھے ہوئے ہے، اسرائیل سے متعلق ہماری پالیسی قائداعظم کے نظریات کے مطابق ہے؛ رضوان سعید شیخ کا امریکی ریاست ٹیکساس کے شہر ڈیلاس میں تقریب سے خطاب
ڈیلاس ( اُردو پوائنٹ اخبارتازہ ترین۔ 13 جولائی 2025ء ) امریکہ میں پاکستان کے سفیر رضوان سعید شیخ نے وضاحت جاری کرتے ہوئے کہا ہے کہ امریکہ کی جانب سے اسرائیل کو تسلیم کرنے کا کوئی دباؤ نہیں ہے۔ امریکی ریاست ٹیکساس کے شہر ڈیلاس میں تقریب سے خطاب کرتے ہوئے رضوان سعید شیخ نے کہا کہ اسرائیل سے متعلق ہماری پالیسی قائداعظم کے نظریات کے مطابق ہے اور امریکہ کی جانب سے اسرائیل کو تسلیم کرنے کا کوئی دباؤ نہیں ہے، پاکستان اپنی خارجہ پالیسی اصولوں پر استوار رکھے ہوئے ہے اور اسرائیل سے متعلق پالیسی کسی بیرونی دباؤ کے تحت نہیں بلکہ اپنی تاریخی، نظریاتی اور اخلاقی بنیادوں پر مرتب کی گئی ہے۔انہوں نے مزید کہا کہ پاکستان کے امریکہ کے ساتھ تعلقات بہتری کی راہ پر گامزن ہیں اور دونوں ممالک کے درمیان تعاون کے نئے امکانات پیدا ہو رہے ہیں، جب کہ پاکستان کرپٹو کرنسی کے شعبے میں سرمایہ کاری کے لیے پرکشش مواقع فراہم کر سکتا ہے کیوں کہ ملک کے پاس وافر مقدار میں بجلی دستیاب ہے، جو اس شعبے میں ترقی کے لیے اہم عنصر ہے۔
یاد رہے کہ ایران اسرائیل جنگ بندی کے بعد امریکہ کے صدر ٹرمپ اور امریکہ کے وزیر خارجہ مارکو روبیو نے انکشاف کیا تھا کہ جلد کئی ایسے ممالک اسرائیل کے ساتھ تعلقات قائم کرنے جا رہے ہیں جو ناممکن لگتے تھے، امریکہ کی جانب سے ابراہم معاہدے میں عرب ممالک کی شمولیت کی کوششیں کی جا رہی ہیں، امریکی حکام نے دعویٰ کیا تھا کہ سعودی عرب بھی اس معاہدے میں شمولیت کے لیے راضی ہو چکا ہے مگر کچھ رکاوٹیں پیش آنے سے معاملات زیر التوا ہیں۔
