محکمہ موسمیات نے آج سے 17 جولائی تک ملک کے مختلف علاقوں میں شدید بارشوں، طوفانی ہواؤں اور آندھی کی پیشگوئی کرتے ہوئے متعلقہ اداروں کو پیشگی حفاظتی اقدامات کی ہدایت جاری کر دی ہے۔
بڑے شہروں اور علاقوں کی تفصیلات:
کراچی میں 16 جولائی تک گرج چمک کے ساتھ بارش کا امکان ہے۔
اسلام آباد اور راولپنڈی میں تیز ہواؤں کے ساتھ گرج چمک اور بارش کی پیشگوئی کی گئی ہے۔
مری، اٹک، چکوال اور گوجرانوالہ کے علاقوں میں بارش متوقع ہے۔
لاہور، سیالکوٹ اور فیصل آباد کے نشیبی علاقوں میں اربن فلڈنگ (شہری سیلاب) کا خدشہ ظاہر کیا گیا ہے۔
خطہ پوٹھوہار اور خیبرپختونخوا میں شام کے اوقات میں بارش اور آندھی متوقع ہے۔
کشمیر اور گلگت بلتستان میں بارش کے ساتھ لینڈ سلائیڈنگ کا خطرہ موجود ہے۔
بلوچستان کے علاقوں بارکھان، ژوب، موسیٰ خیل، سبی میں بھی بارش کا امکان ہے۔
سندھ کے علاقوں سکھر، شکارپور، کشمور اور لاڑکانہ میں چند مقامات پر بارش متوقع ہے۔
احتیاطی تدابیر:
محکمہ موسمیات نے متنبہ کیا ہے کہ طوفانی آندھی کے باعث کمزور ڈھانچوں کو نقصان پہنچنے کا اندیشہ ہے، جبکہ نشیبی علاقوں میں پانی جمع ہونے سے معمولاتِ زندگی متاثر ہو سکتے ہیں۔
محکمہ موسمیات نے ضلعی انتظامیہ، ریسکیو اداروں، بلدیاتی اداروں اور ہائی وے اتھارٹیز کو پیشگی حفاظتی انتظامات کرنے اور ہنگامی صورتحال سے نمٹنے کے لیے الرٹ رہنے کی ہدایت کی ہے۔
شہریوں سے بھی گزارش کی گئی ہے کہ غیر ضروری سفر سے گریز کریں، بجلی کے کھمبوں اور درختوں کے قریب نہ جائیں، اور موسم کی تازہ ترین صورتحال سے باخبر رہیں۔
