مہنگائی کی شرح بھی 38 فیصد سے کم ہو کر سنگل ڈیجٹ میں آ گئی ہے، پاکستان کی معیشت استحکام کی جانب گامزن ہوچکی ہے، پاکستان کو جی20 میں شامل کرنا ہمارا ہدف ہے، نائب وزیراعظم سینیٹر اسحاق ڈار
کوالالمپور (اُردو پوائنٹ اخبارتازہ ترین۔ 11 جولائی 2025ء) نائب وزیراعظم ، وزیرخارجہ سینیٹر اسحاق ڈار نے کہا ہے کہ پاکستان مشکل معاشی حالات میں ٹیک آف کرچکا، پالیسی ریٹ 22 سے کم ہوکر11 فیصد پر آچکا ہے، مہنگائی کی شرح بھی 38 فیصد سے کم ہو کر سنگل ڈیجٹ میں آ گئی ہے، پاکستان کی معیشت استحکام کی جانب گامزن ہوچکی ہے۔ میڈیا کے مطابق کوالالمپور میں پاکستانی کمیونٹی کی تقریب سے خطاب کرتے ہوئے اسحاق ڈار نے کہا کہ بیرون ملک مقیم ہر پاکستانی ملک کا سفیر ہے، پاکستان نے مشکل معاشی حالات میں ٹیک آف کیا، 2016 میں پاکستان کی شرح نمو 3.6 فیصد تھی، 2022 میں پاکستان دیوالیہ ہونے کے قریب تھا، پاکستان کو جی 20 میں شامل کرنا ہمارا ہدف ہے۔2018 تک دنیا کی 24 ویں بڑی معیشت بن چکے تھے۔
مہنگائی 38 فیصد سے کم ہو کر سنگل ڈیجٹ میں آ گئی ہے، پاکستان کی معیشت استحکام کی جانب گامزن ہے، 16ویں ماہ میں پالیسی ریٹ 22 سے 11 فیصد پر آ چکا ہے۔ وزیرخارجہ اسحاق ڈار نے کہا کہ بھارت نے سندھ طاس معاہدہ معطل کر کے عجیب حرکت کی، بھارت پر واضح کردیا تھا کہ پاکستان کا پانی روکنا اقدامِ جنگ تصور کیا جائے گا۔انہوں نے کہا کہ بھارت نہ پاکستان کا پانی روک سکتا ہے اور نہ رخ موڑ سکتا ہے، بھارت کی جانب سے کیے گئے اقدامات پر ہم نے بھرپور جواب دیا، سندھ طاس معاہدے کے معاملے پر ہم نے جواباً بھارتی ایئر لائنز کیلئے حدود بند کیں۔ نائب وزیراعظم نے کہا کہ پاک فضائیہ کے بہادر پائلٹس نے بھارت کے 6 طیارے مار گرائے، مار گرائے جانے والے طیاروں میں سے 4 رفال طیارے تھے، بھارت نے جان بوجھ کر اپنے دو میزائل سکھ آبادی میں گرائے، بھارتی بیانیے کو عالمی سطح پر پذیرائی نہیں ملی۔اسحاق ڈار نے کہا کہ قومی سلامتی کمیٹی کی میٹنگ میں بھارت کو بھرپور جواب دینے کا فیصلہ ہوا، صبح سوا 8 بجے امریکی وزیر خارجہ نے فون پر کہا بھارت جنگ بندی چاہتا ہے، عسکری سطح پر جنگ بندی برقرار ہے، لگتا ہے بھارت کی سیاسی قیادت کو شکست ہضم نہیں ہو رہی۔اسحق ڈار نے کہا کہ کابل جا کر چائے پینے اور دہشتگردوں کیلئے سرحد کھولنے سے پاکستان کا بہت نقصان ہوا، ہم روایتی نہیں اقتصادی سفارت کاری پر عمل پیرا ہیں۔
